काही गोष्टी नको त्या वेळीच का घडतात?
पाहिजे असतात तेव्हा दूरच राहतात
एखादी वस्तू गरजेच्या वेळीच लपते
नको तेव्हा नजरेसमोर नाचत राहते
कुठे जायला निघाले की गाडीची किल्ली हरवते
आईचा ओरडा बसला की हळूच बाहेर निघते
उशीर झाला कधी की बरोबर फोन वाजतो
कंटाळ्याच्या साम्राज्यात मात्र शांत बसून असतो
काही काम आलं महत्वाचं की ह्रिथिकचा पिक्चर लागतो
एरवी टीव्ही वर फक्त गोविंदा आणि मिथुनच नाचतो
अभ्यासाचे पुस्तक घेतला की कविता स्फुरायला लागतात
गणिते सोडवण्या ऐवजी शब्दच उमटू लागतात
खरेदी करूया म्हटले तर एक कपडा आवडत नाही
पैसे नसले खिशात की डोळ्यात भरते सगळे काही
में और मेरी तन्हाई दोघीही जेव्हा बोर होतो
तेव्हाच सगळ्यांना कामात गढण्याचा मूड येतो
मग माझ्या डोक्यावर जेव्हा अर्जंट कामाची तलवार तरंगते
तेव्हा गप्पा मारण्या करिता मित्र मैत्रिणींची हाक येते
या गोष्टींना पण ना! टाईम सेन्स शिकवायला हवा
कारण नको तेव्हा वादळ होतो एरवी पाऊस हवा हवा
